Женскиот фудбалски клуб Тиверија Брера и одбојкарскиот клуб Струмица Жени денеска заеднички учествуваа на едукативна работилница организирана од Спорт Соушл Солушнс, посветена на креирање безбедна спортска средина.
Работилницата беше насочена кон зајакнување на капацитетите за препознавање, превенција и ефикасно справување со случаи на родово базирано и сексуално насилство во спортот, тема која има особена важност за женските спортски колективи. Преку интерактивен пристап и размена на искуства, учесниците добија практични насоки за одговорно и навремено постапување во вакви ситуации.
Претставниците на двата клуба истакнаа дека ваквите едукативни активности се значаен чекор кон создавање здрава, безбедна средина за спортистките, како и кон подигнување на свеста за заштита и меѓусебна поддршка во спортот.
Настанот се одржа во Младинскиот центар во Струмица, а беше упатена благодарност до Општина Струмица за одобрувањето на користењето на просторот, што овозможи успешна реализација на работилницата.
Со вакви заеднички активности, Тиверија Брера и Струмица Жени испраќаат јасна порака дека безбедноста, едукацијата и почитта се темели врз кои треба да се гради спортот.
