Екипата на Работнички продолжува со интензивна активност во зимскиот преоден рок, јасно ставајќи до знаење дека борбата за опстанок во Првата македонска фудбалска лига ќе ја води со значително изменет и засилен ростер.
Нов член на тимот од Дебар Маало е 30-годишниот Шарл Аколатсе, играч од средниот ред со француско потекло и репрезентативно искуство со селекцијата на Того. Роден во Париз, Аколатсе во кариерата има настапувано во повеќе клубови во Франција, Романија и Литванија, а на македонската фудбалска сцена е познат по краткиот ангажман во Силекс во 2019 година. Со Работнички тој потпиша договор на една година и од него се очекува да донесе стабилност и искуство во средниот ред.
Покрај интернационалното засилување, „романтичарите“ го обезбедија и потписот на Јован Попзлатанов, 29-годишен фудбалер кој доаѓа од редовите на Македонија Ѓорче Петров. Попзлатанов е играч кој покрива повеќе позиции на десната страна, како бек, но и како крилен напаѓач, што му дава дополнителна тактичка вредност на тимот.
Во својата кариера Попзлатанов настапуваше за Тетекс, Пелистер и Вардар на домашната сцена, а има и интернационално искуство со летонскиот РФС Рига. Со неговото доаѓање, Работнички добива фудбалер со солидно лигашко искуство и познавање на македонските услови.
Аколатсе и Попзлатанов се дел од серијата засилувања со кои Работнички се обидува да го промени впечатокот од првиот дел од сезоната и да обезбеди мирна пролет во елитата.
