Македонската ракометна репрезентативка Ана Марија Коларовска во вториот дел од сезоната ќе направи важен чекор во кариерата и за првпат ќе настапува надвор од границите на Македонија. Досегашната членка на Металург Автокоманда постигна договор со хрватскиот суперлигаш Брод, каде што ќе има можност да се докаже на нова сцена.
Коларовска е родена на 18 август 2002 година во Скопје, а ракометните почетоци ги направи во школата на Вардар, каде што пет години го градеше својот талент. Потоа настапуваше за Спартак, а најдлабок траг остави во ЖРК Ѓорче Петров. Со „лавиците“ освои четири шампионски титули и два Купа на Македонија, а запиша и значајни резултати на европска сцена. Во ЕХФ Купот, тимот на Ѓорче Петров стигна меѓу осумте најдобри во Европа, а Коларовска се истакна како една од трите најефикасни стрелци во натпреварувањето.
Таа игра на сите бековски позиции и ги има поминато сите младински селекции на националниот тим, а денес е стандарден дел од сениорската репрезентација на Македонија. Во 2024 година настапи и на Европското првенство, со што дополнително го потврди својот квалитет на меѓународно ниво.
Во новата средина во Брод, Коларовска ќе биде втората македонска ракометарка во тимот, по голманката Драгана Петковска. Хрватскиот клуб ја претстави како младо, амбициозно и исклучително ефикасно засилување, од кое очекува значаен придонес во продолжението од сезоната.
