Ракометната репрезентација на Хрватска и селекцијата на Германија се последните две екипи кои си обезбедија место меѓу четирите најдобри на Европското првенство, по возбудливите победи над Унгарија (27-25), односно Франција (38-34), во решавачките натпревари од главната фаза.
Во директната битка за полуфинале во групата 2, Хрватска по вистинска драма ја совлада Унгарија и како првопласирана обезбеди пласман понатаму. Унгарците беа подобар противник во поголем дел од првото полувреме и во неколку наврати имаа и четири гола предност, но „коцкестите“ успеаја да останат во приклучок и на пауза заминаа со прифатливи 15-13.
Слична слика се гледаше и на стартот од вториот дел, кога Унгарија повторно побегна на плус четири, но токму тогаш започна пресвртот. Хрватска трпеливо ја топеше разликата, израмни на 20-20, а во 47. минута за првпат на мечот поведе со 21-20. Следеше неизвесна завршница во која клучна улога одигра голманот Кузмановиќ со неколку врвни интервенции, додека Мандиќ и Шоштариќ беа прецизни кога беше најпотребно. Во самиот финиш, по унгарска грешка, Хрватска го запечати триумфот за големо славје и билет за полуфиналето.
Во вториот клучен дуел од вечерта, Германија со силно и ефикасно издание ја совлада Франција со 38-34 и стави крај на соништата на „триколорите“ за одбрана на европската титула. Германците го презедоа водството по израмнетиот почеток и со серија во средината на првото полувреме се одлепија, па на паузата имаа солидни 19-15.
Иако Франција се обиде да се врати во вториот дел и во неколку наврати ја намали разликата, „панцерите“ не дозволија пресврт. Јури Кнор одигра блескав натпревар и со двоцифрен број погодоци беше лидер во германскиот напад, додека клучни беа и одбраните во завршницата, кога Французите пропуштија шанса за целосно враќање во мечот.
Со овие резултати, полуфиналната четворка е комплетирана – Данска, Исланд, Хрватска и Германија ќе се борат за европската круна, а конечните двојки ќе бидат познати по завршувањето на последните натпревари од групната фаза.
