Ракометарите на РК Вардар ги одработуваат последните подготовки пред настапот на меѓународниот турнир „Labin Handball Cup“, кој од петок (30.01.2026) до сабота ќе се одржи во хрватскиот град Лабин, а финалниот натпревар е закажан за последниот ден од турнирот.
„Црвено-црните“ ќе имаат можност да се одмерат со квалитетни противници, бидејќи покрај Вардар, на турнирот ќе учествуваат и РК Загреб и РК Сесвете од Хрватска, како и словенечкиот тим РК Слован Љубљана.
Првиот предизвик за вардарци е дуелот со РК Слован Љубљана, натпревар кој ќе се одигра во петок, 30 јануари, со почеток од 18:00 часот, во спортскиот центар „Франко Милета“ во Лабин.
Овој турнир претставува одлична можност за стручниот штаб да ја провери формата на екипата, да ротира состав и да ја темпира играта пред продолжението на сезоната, додека за играчите ќе биде значајно меѓународно искуство и тест против силни ривали.
