ЖРК Вардар продолжува со јасна стратегија на подмладување и квалитет, откако во својот состав ги ангажира сестрите близначки Ања и Мила Лашкоски, репрезентативки на Македонија кои пристигнуваат од редовите на Металург Автокоманда.
Двете 17-годишни ракометарки важат за едни од најталентираните во својата генерација и ќе бидат дел и од сениорскиот, но и од кадетскиот состав на „црвено-црните“, што ќе им овозможи континуиран развој и минутажа на повеќе нивоа.
Ања Лашкоски настапува на позицијата лево крило и веќе има значајно меѓународно искуство зад себе. Таа беше дел од кадетското и младинското Европско првенство, каде се истакна со својата зрелост во играта, двонасочен ангажман и прецизност, особено од линијата за седум метри. На континенталниот шампионат беше прогласена и за МВП на натпреварот против Романија.
Нејзината сестра Мила игра на позицијата пикер и исто така е стандарден член на младинските репрезентативни селекции на Македонија. Со нејзиното доаѓање, Вардар добива дополнителни решенија на кружната позиција, како кај сениорките, така и кај кадетките.
Ангажманот на сестрите Лашкоски, заедно со неодамнешното засилување Таида Беровиќ, значи дека голем дел од македонската кадетска репрезентација е веќе концентриран во Вардар, што јасно укажува на визијата на клубот – градење силен тим со домашен потенцијал и долгорочна перспектива.
