Второлигашот Скопје продолжува со сериозни засилување за вториот дел од сезоната, а во насока на остварување на целта – влез во Прва лига.
„Пиратите“ се посилни со искусниот Дарко Глишиќ кој во тимот од Автокоманда доаѓа од редовите на прволигашот Македонија ЃП, а кој всушност е повратник во тимот од Автокоманда.
Низ својата кариера во Македонија беше дел од Вардар, кичевски Напредок, Тетекс, Шкупи, Гостивар и последно за „лавовите“ од Ѓорче, а пак меѓународна кариера градеше во Босна и Херцеговина за екипата на Олимпик, во Грузија за Динамо Тбилиси, за бугарските екипи Септември Софија и Арда Крџали, а беше и во Кипар каде го носеше дресот на Докса Катокопијас.
34-годишниот Глишиќ игра како лев бек, а може и како лево крило и треба да биде големо засилување во тимот на Александар Таневски.
Претходно, Скопје се засили со искусниот голман Кристијан Наумовски, Бесмир Даци и Симеон Христов.
Скопје под „полна пареа“ се подготвува за пролетниот дел, а преку одигрување на пријателски натпревари, стратегот Таневски има јасна слика за тоа како оди подигањето на формата на неговиот тим, кој пролетниот дел го отвара како апсолутен фаворит против Слога во Виница.
