Утре на натпреварот од Лигата на шампионите помеѓу ПСЖ и Њукасл Јунајтед, кој ќе се одигра со почеток од 21:00 часот, македонскиот фудбал повторно ќе има свој претставник на големата европска сцена. Нашата Александра Пејковска е назначена за УЕФА делегатка на овој значаен европски дуел.
Пејковска, која веќе подолго време успешно ја претставува Македонија на меѓународните натпреварувања под капата на УЕФА, уште еднаш ја добива довербата за организација и надзор на натпревар од највисок ранг, што претставува признание за нејзината професионалност и квалитено работење.
На овој меч од елитното европско натпреварување главен судија ќе биде искусниот словенечки арбитар Славко Винчиќ. Негови асистенти ќе бидат Томаж Кланчник и Андраж Ковачиќ, додека улогата на четврти судија ќе ја има Давид Шмајц, сите од Словенија. За ВАР системот ќе биде задолжен Германецот Кристијан Дингерт, а негов асистент ќе биде Саша Штегеман, исто така од Германија. Контролор за судењето ќе биде Давид Фернандез Борбалан од Шпанија.
Ангажманот на Александра Пејковска на ваков натпревар е уште една потврда за високата репутација што ја ужива меѓу европските фудбалски институции. Нејзиното присуство на меч од Лигата на шампионите претставува голема чест, но и силна афирмација за македонскиот фудбал на меѓународната сцена, покажувајќи дека македонските фудбалски работници се дел од самиот врв на европскиот фудбал.
