Борбата за пласман во полуфиналето на Европското ракометно првенство во групата 2 влезе во целосен хаос по второто коло од главната фаза. По победата на Хрватска над Швајцарија и изненадувањето на Исланд против Шведска, дури четири репрезентации се израмнети на врвот со по четири бода – Исланд, Шведска, Словенија и Хрватска.
Иако хрватската селекција го направи тоа што беше во нејзина моќ против Швајцарија, ситуацијата во групата се искомплицира до тој степен што ниту две победи до крајот не гарантираат сигурен пласман во полуфиналето. Теоретски, можно е Хрватска да остане без место меѓу најдобрите четири доколку Исланд и Шведска ги добијат сите свои преостанати натпревари, што би создало затворен круг во кој хрватската репрезентација би била најслаба според гол-разликата.
Сценаријата се бројни, но едно е јасно – Хрватска мора да брка победа против Словенија, а потоа и против Унгарија, и притоа да се надева на барем еден „кикс“ на Исланд или Шведска во нивните преостанати дуели. Дополнително, постои и специфично сценарио во кое Хрватска би можела да обезбеди полуфинале и пред последното коло, доколку ги добие Словенците, а тие потоа изненадат против Исланд.
Во спротивно, доколку Исланд продолжи со победничката серија, а Шведска ги оправда очекувањата, тогаш хрватската селекција ќе мора да бара позитивен резултат и против Унгарија, со надеж дека Швајцарија ќе успее да „откине“ бодови од Швеѓаните.
Јасно е дека до самиот крај ќе се води жестока битка за првите две позиции, а секој гол и секој резултат ќе има огромно значење.
- Комплетен распоред до крајот на групата 2:
27 јануари
Швајцарија – Исланд (15:30)
Словенија – Хрватска (18:00)
Шведска – Унгарија (20:30)
28 јануари
Словенија – Исланд (15:30)
Хрватска – Унгарија (18:00)
Швајцарија – Шведска (20:30)
Првите две селекции од групата ќе обезбедат пласман во полуфиналето, а драмата, според се, ќе трае до последниот судиски свиреж.
