Општинскиот фудбалски сојуз Кичево, преку претседателот во оставка Марјан Ристевски, упати покана до Фудбалската федерација на Македонија за одржување вонредно изборно собрание на ОФС Кичево, закажано за 23 јануари 2026 година во 18:00 часот, во „Куќата на уметноста“ во кичевското село Кнежино.
Овластени претставници на Фудбалската федерација на Македонија навремено беа присутни на закажаното собрание, но истото не се одржа поради немање кворум за работа и одлучување.
Дополнително, на собранието не се појавија ниту организаторите, односно претседателот во оставка Марјан Ристевски, потпретседателот Џевдет Далипи и делегатот Муамед Сејдини.
Отсуството на лицата кои го иницираа и го закажаа вонредното изборно собрание претставува сериозен преседан и крајно несоодветен однос кон процесите на управување во рамки на Општинскиот фудбалски сојуз – Кичево.
Ваквиот пристап е јасен показател за нефункционалност и нарушена организациска структура во ОФС Кичево, што неминовно го отвора прашањето за неговото натамошно функционирање согласно важечките акти и одредби на сојузот.
Од ФФМ најавија дека ќе се постапува во согласност со своите надлежности и важечката регулатива.
