Непоразениот лидер во Втората женска фудбалска лига, Конзули од Битола ги стартуваше зимските подготовки за вториот дел од сезоната.
Конзули зад себе има успешна есен со максимален ефект и без конкуренција е на врвот од табелата, а во пролетниот дел ќе треба да се повтори само челната позиција и тимот да обезбеди враќање во Првата женска фудбалска лига. Битолскиот тим има седум победи од толку натпревари и максимални 21 бод, а статистиката е за почит – 55 постигнати погодоци што е убедливо најмногу и само еден примен гол што е исто така убедливо најдобра одбрана во второлигашкото друштво.
Како што дознава Спортска Мрежа ростерот од есенскиот дел е сочуван, а поради квалитетот истиот без проблеми треба само да се „прошета“ низ вториот дел од шампионатот и да го подигне шампионскиот пехар и со тоа да обезбеди место во фудбалската елита во женска конкуренција.
Како што дознаваме ќе бидат одиграни неколку пријателски натпревари, а во следните денови ќе бидат познати противниците и датумите кога ќе се одиграат истите.
Пролетниот дел Конзули го отвара со гостување во Велес против екипата на Борец.
