Третолигашот Победа Валандово испрати силна порака пред продолжението на сезоната, откако на пријателски натпревар одигран на Градскиот стадион во Валандово убедливо го совлада второлигашот Вардар Неготино со 3:0.
Во рамки на зимските подготовки за пролетниот дел, домаќинот – есенски шампион во Трета лига – Исток и единствен тим без пораз во првиот дел од сезоната – целосно го надигра ривалот од повисок ранг. Победа уште во првите 45 минути воспостави целосна контрола и замина на пауза со предност од 2:0.
Во продолжението, валандовци ја заокружија доминацијата со уште еден погодок, потврдувајќи го високиот триумф и носејќи голема радост кај верните „калинкари“ на трибините.
Апсолутен херој на натпреварот беше Столе Наков, кој двапати ја затресе мрежата на гостите од Неготино, додека конечните 3:0 ги постави Мите Станков.
Победа Валандово зад себе има извонредна есенска полусезона, во која без пораз го освои првото место и со јасни амбиции влегува во пролетниот дел – да ја потврди лидерската позиција и да избори бараж за пласман во Втората лига.
На спротивната страна, Вардар Неготино по есенскиот дел се најде во незавидна позиција. Тимот го заврши првенството на 12. место со 12 освоени бодови, во зоната за директно испаѓање, па во продолжението од сезоната го очекува жестока битка за опстанок во второлигашкото друштво.
