Ракометната репрезентација на Франција одигра еден од најефикасните и најимпресивни натпревари на Европското првенство, совладувајќи ја Португалија со 46:38 во третото коло од главната фаза. Натпреварот во Хернинг ќе остане запаметен и како еден од најголемите голеади во историјата на континенталните шампионати.
„Триколорите“ од самиот почеток наметнаа убиствен ритам. Првото полувреме беше вистинска демонстрација на моќ – Французите постигнаа неверојатни 28 гола и на пауза заминаа со огромни +13 (28:15), практично решавајќи го прашањето за победникот уште пред одморот.
Во вториот дел темпото беше нешто поумерено, но Франција рутински ја контролираше играта и без проблеми го приведе мечот кон убедлив триумф, со кој останува цврсто во трката за пласман во полуфиналето.
Најрасположен во францускиот состав беше Дика Мем со осум погодоци, додека Лудовик Фабрегас додаде уште шест. Кај Португалија се истакнаа неколку ракометари, при што Брандао, Бранкињо, Фраде, Итуриза и Роча постигнаа по пет голови.
Со оваа победа Франција стигна до четири бодови и направи значаен чекор кон завршницата на шампионатот. Во следното коло ја очекува дерби со Шпанија, додека Португалија ќе се обиде да остане во игра преку дуелот со Норвешка.
