Шкендија Арачиново официјално го промовираше Енис Дервиши како најново засилување во пресрет на пролетниот дел од сезоната. 28-годишниот фудбалер од денеска е дел од „црвено-црната“ фамилија и треба да донесе дополнителна стабилност во одбранбената линија.
Дервиши настапува на позицијата десен бек, а се одликува со сигурност во дефанзивата, брзина и солидно искуство. Во Арачиново пристигнува од редовите на второлигашот Тетекс, каде што настапуваше во есенскиот дел од шампионатот.
Во својата кариера, новиот фудбалер на Шкендија има настапувано и за екипите на Гостивар, Воска Спорт и Работнички, а токму во Шкендија ги направи и првите фудбалски чекори, што овој трансфер му дава и посебна симболика.
Со ангажманот на Дервиши, раководството на клубот продолжува со јасна стратегија за засилување на тимот со проверени и квалитетни фудбалери, со цел исполнување на амбициите во продолжението од сезоната.
Шкендија Арачиново ја поминува зимската пауза на втората позиција на табелата во Втората лига со 35 освоени бодови, само еден помалку од лидерот Охрид. Пролетниот дел од шампионатот тимот ќе го започне на домашен терен против екипата на Преспа од Ресен, каде ќе се обиде веднаш да ја потврди добрата форма и високите амбиции.
