Балканската одбојкарска асоцијација (БВА) утре во Сараево ќе го одржи своето 27. Генерално собрание, на кое ќе бидат присутни делегатите од сите федерации-членки, меѓу кои и претставници на Македонската одбојкарска федерација.
Македонија на овој значаен собир ќе ја претставуваат претседателот Петар Јовановски и генералниот секретар Филип Деспотовски, кои ќе учествуваат во дискусиите поврзани со идните планови и развојните насоки на организацијата.
На седницата, делегатите ќе ги разгледуваат извештаите за активностите на БВА во текот на изминатата година, како и комплетниот финансиски извештај за работењето на Асоцијацијата.
Една од најважните точки на дневниот ред ќе биде дефинирањето на календарот за натпреварувањата во 2026 година, со посебен акцент на организацијата на БВА Балканските шампионати 2026 во одбојка и одбојка на песок.
Генералното собрание претставува клучен момент за навремено планирање и успешна реализација на најзначајните натпреварувања во регионот, но и можност за размена на мислења и идеи за унапредување на регионалната соработка. Воедно, целта е преку заеднички активности да се обезбеди континуиран развој и популаризација на одбојката на Балканот.
