Денес во „Куќата на фудбалот“ беа извлечени двојките за четвртфиналето од Купот на Македонија.
Ждрепката посака актуелниот бранител на Куп титулата, Вардар да се соочи со второлигашот Охрид. Второлигашот Детонит Плачковица од Радовиш ќе игра со прволигашот Силекс, Струга Трим Лум на мегдан со Шкендија.
Второлигашот Шкендија Арачиново ќе игра со Работнички, а ова ќе биде реприза од минатата сезона, кога тимот од Арачиново тогаш како третолигашот го исфрли Работнички.
Во борбата за место меѓу најдобрите четири влегуваат прволигашите Работнички, Вардар кој е бранител на Куп титулата, Струга Трим Лум, Силекс и Шкендија, а пак од второлигашите место во полуфиналето ќе бараат Охрид, Детонит Плачковица и Шкендија Арачиново.
Мечевите се закажани за 25. февруари.
Се игра еден натпревар, а победниците обезбедуваат пласман во полуфиналето. Освојувачот на Купот на Македонија обезбедува излез во Европа, односно игра квалификациите за Конференциска лига на УЕФА.
