Второлигашот Осогово од Кочани го објави распоредот на пријателски натпревари кои ќе ги одигра во рамки на подготовките за пролетниот дел од сезоната.
Екипата предводена од тренерот Крсте Крстев со тренинзи ќе стартува на 17 јануари, а веќе од крајот на месецот ќе влезе во серија контролни средби.
Првиот тест е закажан за 24 јануари (сабота), кога Осогово на Градскиот стадион „Никола Мантов“ во Кочани ќе се соочи со Детонит Плачковица. Четири дена подоцна, на 28 јануари (среда), кочанчани ќе гостуваат во Скопје кај Аеродром 2018, клуб кој настапува во Третата лига – Север.
Следниот контролен натпревар е предвиден за 31 јануари (сабота) против Беласица, додека најатрактивниот дуел ќе се одигра на 7 февруари (сабота), кога Осогово повторно на домашен терен ќе ги одмери силите со есенскиот шампион во Прва лига, скопски Вардар. Генералката е планирана за 13 февруари (сабота) против Вардар Неготино.
Со овој распоред Осогово ќе има можност да се тестира против екипи од различен ранг, при што дуелот со Вардар ќе биде вистинска проверка на моменталната форма и квалитетот на тимот пред продолжението на второлигашката конкуренција.
