ГРК Охрид продолжува со јасната стратегија за стабилност и континуитет, откако клубот официјално потврди дека тројца ракометари остануваат дел од тимот и во наредните сезони.
Левото крило Никола Ристески и пивотменот Иван Тасески ја продолжија соработката со охридскиот суперлигаш до 2028 година, додека левиот бек Дејан Кукуловски потпиша договор до 2027 година.
Со овој потег, раководството на клубот од градот крај Охридското Езеро испраќа јасна порака дека се гради екипа на подолг рок, која треба да има значајна улога на домашната и меѓународната сцена.
Тројцата ракометари се дел од костурот на тимот и важна алка во концептот на стручниот штаб предводен од Борис Ројевиќ.
Охрид зад себе има успешен настап и во европските натпреварувања, каде што стигна до осминафиналето на ЕХФ Европскиот Куп, а со задржувањето на проверени сили клубот јасно ги најавува високите амбиции и за сезоните што следуваат.
