Второлигашот Скопје направи значаен потег во пресрет на пролетниот дел од сезоната, ангажирајќи го искусниот голман Кристијан Наумовски како адут во борбата за пласман во Првата македонска фудбалска лига. Второлигашот од Автокоманда со овој трансфер јасно ги истакна амбициите за повисок пласман и стабилност во клучниот дел од сезоната.
Наумовски по повеќе од две години повторно се враќа на македонските терени, откако последниот ангажман го имаше во Азија, каде настапуваше за Брунеи ДПММ во малезискиот шампионат. Со 37 години и богато интернационално искуство, тој треба да донесе сигурност и лидерство во одбраната на Скопје.
Искусниот чувар на мрежата е добро познат на домашната фудбалска јавност, особено по настапите за Работнички и Шкупи, но и по интернационалната кариера во Романија, Бугарија, Малта и Хонг Конг. Во минатото беше дел и од младинската и сениорската репрезентација на Македонија, што дополнително ја нагласува неговата фудбалска биографија.
ФК Скопје есенскиот дел од ВМФЛ го заврши на петтата позиција со 29 освоени бодови, а пролетната полусезона ќе ја започне со гостување кај Слога Виница. Со Наумовски меѓу стативите, тимот од Автокоманда ќе се обиде да ја зголеми конкуретноста и да се вклучи во сериозна трка за враќање во прволигашкото друштво.
