Еден од најперспективните млади фудбалери во државата, Драган Петков, оствари средба со градоначалникот на Општина Валандово, Ѓоко Камчев. Петков е стандарден член на македонската фудбалска репрезентација до 15 години и веќе зад себе има богато искуство на репрезентативно ниво.
Младиот фудбалер потекнува од фудбалската школа Победа Кидс, денес позната како Либра Кидс, каде во сезоната 2024/25 во лигата на петлиња се истакна како најдобар стрелец. Петков има повеќе од 15 настапи за националниот дрес, а од новата полусезона ќе го носи дресот на скопски Њу Старс, што претставува значаен чекор во неговиот понатамошен развој.
Тој настапува на позициите крилен напаѓач и полушпиц, а своите квалитети ги потврди и на последниот натпревар против соодветната селекција на Турција, кога беше прогласен за играч на натпреварот. Во победата на Македонија од 3:2, Петков постигна гол и запиша асистенција, оставајќи силен впечаток со својата игра.
На средбата, заедно со неговите фудбалски тренери, беше отворена и темата за развојот на младинските категории во општината, кои во последните години бележат резултати за почит. Градоначалникот на Валандово истакна дека локалната самоуправа ќе продолжи да ги поддржува младите спортски таленти.
„Заедно со неговите фудбалски учители разговаравме за можностите како и на кој начин општина Валандово да помогне во развојот на младите фудбалски категории, кои што во изминатите неколку години постигнуваат резултати за респект. Како градоначалник на општина Валандово, ќе му предложам на општинскиот Совет, Драган Петков да биде стипендист на нашата општина“, изјави градоначалникот на општина Валандово, Ѓоко Камчев.
Поддршката од Општина Валандово претставува дополнителен мотив за младиот репрезентативец, кој со своите настапи веќе го најавува потенцијалот за успешна фудбалска иднина.
