Второлигашот Брегалница денес ги започна подготовките за пролетниот дел од сезоната, а целта на „сините“ е враќање во фудбалската елита на Македонија.
Стратегот Влатко Костов денес ги собра сите фудбалери и со првиот тренинг на Градскиот стадион во Штип започнаа подготовките. Во пролетниот дел дресот на Брегалница нема да го носат Хусеин Демири, Дарко Алексовски – Пеле и Еди Мандак.
Засега единствено засилување е Бојан Рајков кој е повратник во редовите на Брегалница од Силекс, а според информациите на Спортска Мрежа, раководството на клубот води преговори со неколку играчи и се очекува во следниот период нивна промоција ако има договор.
Во следниот период ќе треба да има повеќе информации и околу самиот тек на подготовките односно одигрувањето на пријателски натпревари.
Брегалница заврши во бараж зоната за Прва лига како трета со 33 бодови, три помалку од лидерот Охрид кој има 36 бодови, а пак Шкендија Арачиново е втора со 35 бодови.
Пролетниот дел тимот на Брегалница го отвара во Гевгелија против Кожуф.
