Поранешниот македонски репрезентативец и интернационалец, а во моментов извршен директор на Европската одбојкарска конфедерација (ЦЕВ), Вук Карановиќ, е избран меѓу Топ 300 исклучителни лидери за Глобална извонредност за 2025 година. Карановиќ го доби признанието во категоријата „Социјално влијание и цел“.
Конкуренцијата беше исклучително силна, со повеќе од 12.000 поднесени номинации во осум категории: бизнис лидери, лидери на мисла, здравствена заштита и биолошки науки, оперативна извонредност, социјално влијание и цел, жени во лидерство, младо претприемништво, како и вештачка интелигенција и дигитална трансформација.
Секоја номинација поминува низ детален процес на евалуација, при што се вреднуваат лидерството, влијанието и уникатниот придонес на кандидатите во соодветната област.
Признанието е поддржано од „Excellence Talks“ во партнерство со „KAIZUNO“, под мотото „Извонредноста не е титула. Таа е одговорност.“
