По контролниот натпревар со Македонија во кој Хрватска славеше со 26-23, селекторот Дагур Сигурдсон направи промена во составот за претстојното Европско првенство. Поради повредата на левиот бек Леон Љевар, стручниот штаб мораше итно да реагира и да внесе ново решение на таа позиција.
Во националниот тим повторно беше повикан ракометарот на Охрид, Анте Иванковиќ. Хрватскиот интернационалец ги мина целосно подготовките во првата фаза и веќе е запознаен со системот на игра, па за него нема да биде потребен дополнителен период за адаптација.
Со враќањето во репрезентацијата, Иванковиќ ќе се бори за место на конечниот список на Сигурдсон за дуелите во групната фаза, каде што Хрватска ќе се соочи со Грузија, Холандија и Шведска. До почетокот на шампионатот, избраниците на исландскиот стратег ги очекуваат уште два силни теста против Германија — најпрво во Загреб, а потоа и во Хановер.
