Македонската машка кадетска репрезентација ја заокружи контролната серија со уште една сигурна победа против Црна Гора, славејќи со 31-24 во вториот пријателски натпревар.
По убедливиот вчерашен триумф со 15 гола разлика, избраниците на селекторот Горан Кузманоски и овојпат го контролираа резултатот во најголемиот дел од дуелот, иако противникот даде посериозен отпор.
Дуелот започна со водство од 6-2 за нашите кадети, но гостите успеаја да се вратат и да израмнат на 11-11. На полувремето Македонија замина со минимална предност од 14-13, по што во второто полувреме следуваше поконцентрирана игра и целосна доминација до конечни 31-24.
Во листата на стрелци се истакна Стефан Ѓеоргиески со девет погодоци, Јован Петрески постигна шест, додека Лука Јовиќ и Бобан Поповски се запишаа по пет пати.
Двата контролни натпревари против Црна Гора претставуваа дел од подготовките за настапот на Европското првенство што ќе се одржи во август во Србија.
