Во Струмица во тек е реконструкција на мултифункционалното спортско игралиште кое се наоѓа во склоп на СОУ „Јане Сандански“, со што се прави значаен чекор кон унапредување на спортската инфраструктура во градот. Проектот има за цел да обезбеди современи услови за спорт и рекреација, како за учениците, така и за пошироката јавност.
Реконструираниот простор ќе опфаќа фудбалско и кошаркарско игралиште, изработени со модерна полипропиленска подлога, која овозможува поголема безбедност, издржливост и квалитет при користење.
Игралиштето првенствено ќе им служи на учениците од училиштето за наставни и воннаставни активности, но ќе биде отворено и за локалните спортски клубови, како и за граѓаните на Општина Струмица.
„Реконструкцијата е финансирана од Министерството за спорт со поддршка од Општина Струмица. Голема благодарност за овој проект до Министерството за спорт“, рече градоначалникот на општина Струмица, Петар Јанков.
Со реализацијата на овој зафат, Струмица добива уште еден квалитетен спортски капацитет, кој ќе придонесе за поголема вклученост на младите во спортот и ќе создаде подобри услови за развој на училишниот и рекреативниот спорт во градот.
