Прволигашот Пелистер официјално ги утврди плановите за зимските подготовки пред продолжението на сезоната.
Битолскиот клуб ќе ги започне подготовките за вториот дел од првенството на 9 јануари 2026 година, со работен состанок и прв тренинг на стадионот „Петар Милошевски“. Со тоа, „зелено-белите“ ќе ги означат првите активности во новата година, насочени кон темелна подготовка и подигнување на формата.
Првата фаза од подготовките ќе се реализира во Битола, по што екипата од 17 до 31 јануари ќе замине на подготовки во Анталија, Турција, каде што ќе биде ставен акцент на интензивни тренинзи и проверка на формата преку меѓународни пријателски натпревари.
Во текот на престојот во Турција, Пелистер ќе одигра три контролни средби:
- 20 јануари: Пелистер – Спартак Суботица (Србија)
- 24 јануари: Пелистер – Железничар (Босна и Херцеговина)
- 28 јануари: Пелистер – Невбахор Наманган (Узбекистан)
Паралелно со тренажниот процес, стручниот штаб ќе работи и на комплетирање на ростерот.
Исто така, на 9 јануари клубот ќе одржи прес-конференција и медиумски брифинг, на кој ќе присуствуваат претставници на клупската управа, шефот на стручниот штаб Милан Стојановски, како и дел од фудбалерите, кои ќе ги споделат очекувањата и плановите за пролетниот дел од сезоната.
