Македонскиот ракометен суперлигаш МРК Куманово официјално доби нов шеф на стручниот штаб. Српскиот ракометен стратег Александар Радосављевиќ ќе го води тимот во продолжението од сезоната, откако двете страни потпишаа договор со важност од две години.
Радосављевиќ во Куманово пристигнува со богато меѓународно искуство и сериозно тренерско портфолио. Последниот ангажман го имаше како тренер на РК Леотар, а во својата кариера ги предводел и клубовите Горажде, Врање, Металац Краљево, Зајечар, Железничар Сараево, како и неколку женски екипи меѓу кои Напредак, Бамби Пожаревац, Металац и грчкиот Орми Патрас.
Покрај клупската кариера, новиот тренер на Куманово има и значајно репрезентативно искуство. Бил селектор на женската јуниорска репрезентација на тогашна Србија и Црна Гора, ја водел машката кадетска селекција на Србија, како и машката сениорска репрезентација на Босна и Херцеговина.
МРК Куманово есенскиот дел од сезоната во Суперлигата го заврши на 10. место со освоени седум бодови и во пролетниот дел го очекува тешка борба за директен опстанок во ракометната елита. Клубот верува дека искуството и знаењето на Радосављевиќ ќе бидат клучни во остварувањето на оваа цел.
Дебито на новиот тренер на клупата се очекува во продолжението од првенството, каде Куманово ќе се обиде да ја подобри својата позиција и да обезбеди сигурен суперлигашки статус.
