Последното есенско коло го донесе најголемото изненадување досега во Првата футсал лига – актуелниот шампион Форца доживеа шокантен пораз од Мал Ајакс, резултат што сериозно ги искомплицира амбициите на тимот од Куманово во битката за одбрана на титулата.
Неочекуваниот кикс на Форца широко ги отвори вратите за есенскиот лидер КМФ Проект, кој сега има јасна шанса уште посериозно да го нападне шампионскиот трофеј. Тимот од Јосифово од овој момент зависи исклучиво од себе.
Пред Проект е последниот меч во 2025 година, односно финалниот дуел од есенскиот дел, гостување кај Бутел. Победа таму би значела перфектна есен со девет победи од девет натпревари и потенцијални шест бодови предност на врвот од табелата.
Во такви околности, Проект би влегол во пролетниот дел како апсолутен господар на својата судбина. Првиот човек на клубот, Иван Гавровски, во гостувањето во „Спортска Мрежа“ истакна дека во зимскиот преоден рок се планираат едно до две засилувања, но концептот останува ист – ростер составен исклучиво од македонски играчи.
Додека Форца ја очекува пеколна пролет и трка од позиција на притисок, Проект влегува во фаза каде што секој чекор зависи само од него. Јосифово е чекор поблиску до титулата, Куманово чекор подалеку.
Сè повеќе мириса дека сезоната 2025/26 може да донесе нов шампион во македонскиот футсал.
