Непоразениот лидер Проект приреди вистинска футсал-лекција и без милост го декласираше Осогово од Крива Паланка со неверојатни 18:0, во рамки на 8. коло од Првата футсал лига.
Резултатот делува шокантно, но развојот на натпреварот уште пред почетокот ја навести судбината на гостите. Осогово во Гевгелија пристигна со само пет играчи, без ниту една опција на клупата, што во ваков ритам и квалитет беше јасна најава за тешка вечер.
Проект од самиот старт воспостави апсолутна контрола, диктираше темпо и ја казнуваше секоја слабост на противникот. Во првото полувреме паднаа девет гола, а идентичен епилог имаше и вториот дел. Во просек, Осогово примаше гол на секои две минути и 13 секунди, податок кој најдобро ја отсликува целосната доминација на домаќинот.
- ЗАПИСНИКОТ ОД НАТПРЕВАРОТ МЕЃУ ПРОЕКТ И ОСОГОВО:
Најрасположен беше Ѓорги Коцевски со пет погодоци, додека Кристијан Гавровски додаде четири. Во офанзивната рапсодија се вклучија и Горан Стојанов, Никола Анчевски и Наум Блажевски, кои по двапати ја тресеа мрежата, а листата на стрелци ја комплетираа Трајче Димитриев, Марио Благојевски и Адријан Трајков. Речиси целиот ростер на Проект се запиша меѓу стрелците.
Со оваа победа, Проект останува цврсто на врвот со 24 бодови, три повеќе од актуелниот шампион Форца, кој е втор со 21 бод. Осогово, пак, привремено е на осмата позиција, а конечниот пласман по ова коло ќе биде познат по комплетирањето на рундата.
Во следното коло, Проект го очекува гостување кај Бутел, додека Осогово на домашен терен ќе се обиде да се рехабилитира против екипата на Клими од Кавадарци.
