Репрезентацијата на Македонија до 18 години во изминативе неколку дена престојуваше на мини-подготовки во Струмица, во чии рамки одигра два контролни натпревари против соодветната селекција на Црна Гора.
Избраниците на селекторот Димитар Капинковски на двата меча забележаа победи со идентичен резултат од 2:1, со што испратија охрабрувачка најава пред квалификацискиот турнир што ги очекува следната година.
„Овие натпревари ги искористивме за воигрување на екипата, бидејќи во март следната година не очекуваат квалификации за пласман на Европското првенство. За дуелите со Црна Гора сметав на 25 фудбалери и сите добија можност за настап, што за стручниот штаб беше одлична шанса да видиме со каков потенцијал располагаме и на кои сегменти треба дополнително да работиме“, изјави Капинковски.
Предводникот на младата селекција истакна дека е задоволен од ангажманот и посветеноста на играчите, што, според него, се потврдува и со резултатите остварени на теренот на комплексот „Горан Пандев“ во Струмица.
„Фудбалерите максимално ја искористија можноста да тренираат и да настапуваат заедно. Задоволен сум од нивниот пристап, залагањето на тренинзите и дисциплината на натпреварите. Сметам дека оваа генерација поседува сериозен потенцијал и доколку продолжи да работи со ист интензитет, со поддршка од клубовите, може да очекуваме добри резултати во иднина“, додаде селекторот.
Оваа генерација на почетокот од следната година ја очекува силен квалификациски турнир, кој ќе претставува вистински тест за можностите на младите македонски фудбалери.
„Целосно сме фокусирани на квалификациите што ќе се одржат во март. Покрај домаќинот Холандија, наши противници ќе бидат и селекциите на Фарските Острови и Молдавија. До тогаш ќе се обидеме да организираме уште еден собир и дополнителен контролен натпревар, со цел што подобро да се подготвиме за главниот предизвик“, заклучи Капинковски.
