Ракометарите на Преспа од Ресен денеска имаа посебна привилегија да бидат угостени од составот на двократниот европски првак Вардар. Ресенските ракометари го искористија денот за дружење, фотографирање и запознавање со своите идоли – клуб кој остави голема трага во европскиот ракомет и двапати се искачи на врвот на Лигата на шампионите, во сезоните 2016/17 и 2018/19.
Од клубот од Ресен истакнаа дека ова било исклучително важно искуство за младите ракометари, кои имале можност одблиску да видат како функционира еден од најуспешните клубови во македонскиот спорт.
„Нашите ракометари имаа можност да бидеме угостени од ракометарите на двократниот европски првак Вардар! Да се дружиме и фотографираме со нашите идоли. Му посакуваме успех и среќа на денешниот дерби натпревар во Битола, против ракометниот клуб Еурофарм Пелистер“, порачаа од РК Преспа.
- Клуб со богата историја и европско искуство
РК Преспа Јафа Промет е клуб со долга ракометна традиција и значајни успеси. Во сезоната 1996/97, тимот од Ресен ја освои македонската Супер лига, што им донесе учество во ЕХФ Купот. Како национални прваци, Преспа доби право да настапува и во престижната Лига на шампионите во сезоната 1997/98.
Европското поглавје продолжи и следната година повторно во ЕХФ Купот, а во сезоната 2007/08 клубот повторно се врати на меѓународната сцена, учествувајќи во Челенџ Купот.
- Поддршка за дербито во Битола
Ресенскиот клуб испрати јасна порака на поддршка кон Вардар, кој вечерва го игра едно од најголемите ракометни дербија – гостување кај Еурофарм Пелистер во Битола. Меч кој отсекогаш буди огромно внимание, а оваа сезона носи и дополнителна тежина во борбата за врвот.
