Работнички имаше очајна есен, досега собра само седум бодови и се наоѓа на претпоследната позиција на табелата во Првата лига. Со само една победа, и со четири ремија во досегашните 15 кола, тимот од Дебар Маало апсолутно потфрли.
Го знае тоа и голманот Васко Василев, кој вели дека денешниот дуел со Силекс е добра можност барем нешто да се спаси.
„Знаеме дека оваа полусезона Работнички тотално потфрли. Нѐ очекува последниот есенски дуел против Силекс и ќе сториме сѐ барем малку да ја намалиме штетата. Што се вели, барем малку да се спаси од она што не го исполнивме како план и цели на тимот. Работевме напорно изминатиот период и се надеваме дека конечно ќе одиграме добар натпревар и ќе освоиме бодови“, изјави Васко Василев.
Натпреварот меѓу Работнички и Силекс се игра на Арената „Тодор Проески“, со почеток во 13 часот.
