Женската ракометна репрезентација на Македонија го затвори настапот на меѓународниот турнир во Анкара на најдобар можен начин – со победа над Словачка (26-24) и заслужено освоено прво место. Нашите ракометарки запишаа две победи и едно реми, и целосно ја оправдаа улогата на тим кој е во силен подем пред продолжението на квалификациите за ЕП 2026.
Дуелот со Словачка беше најтежок на овој турнир, исполнет со пресврти и голема тактичка борба. Словачките ракометарки први ја наметнаа ритамот и стигнаа до почетна предност, но Македонија брзо ја стабилизираше играта и се врати во егал. Целото прво полувреме помина во минимални разлики, а на паузата резултатот беше изедначен – 12-12.
Во продолжението, избраничките на селекторот Кристијан Грчевски заиграа многу поагресивно во одбраната. Со пресечени додавања, сигурни интервенции на голот и брзи трансформации, Македонија се одлепи на +3 (15-12), во период кога противникот цели 11 минути не можеше да постигне гол.
Предноста од три до четири гола цврсто се држеше речиси до самиот финиш. Иако Словачка се доближи на 24-26 и имаше можност да ја намали разликата на само еден гол, македонската одбрана остана концентрирана, а Илиќ со уште една клучна интервенција го потврди триумфот.
Најефикасни кај Македонија беа Јована Кипријановска, која повторно ја презеде улогата на лидер во нападот, и Ризоска со шест гола. Гугуљанова се истакна со четири погодоци, додека Коцева, Гакидова и Јанкуловска внeсоa сигурни решенија во клучните моменти.
Македонија претходно ја совлада Турција (29-26) и ремизираше со Словенија (23-23), резултати што ја поставија како најконстантен тим на турнирот.
Следната задача пред „црвено-жолтите“ е двомечот со Белгија од квалификациите за Европското првенство 2026, каде што ќе влезат со голема самодоверба по одличните партии во Анкара.
