На сите натпревари од шестото коло на Општинската фудбалска лига во Струмица беа постигнати погодоци, најмногу имаше во радовишкото село Злеово, каде Слога со 6:4 го доби Напредок од Радово, со што гостинот останува „фенерџија“ без бодови во четвртото по ранг фудбалско натпреварување.
Хет-трик постигна искусниот Зоран Спасов, ова е прв хет-трик за тимот на Слога, двапати погоди Рузгер Алемдар, а пак еден гол постигна Мите Стоименов.
Тимот од Злеово стигна до третиот триумф, а голема заслуга за победата имаше Спасов, Напредок во впиша шестиот пораз од толку натпревари.
„Спартманците загубија глава“ во Добрејци, откако Илинден со минимални 1:0 го совлада досега непоразениот Спартмани и го симна од врвот на табелата.
Огражден дојде до третото славје и се приближува кон горниот дел од табелата, откако на својот терен во Ново Село со 2:0 го доби Дрвош кој го забележа третиот пораз.
Интер Кукла службено го доби мечот со Единство во Пиперово (0:3) со тоа и службени три бодови на своето конто.
Интер Кукла е на врвот со 15 бодови, а Спартмани од Балдовци се спушта сега на второто место со 13 бодови. Огражден е трет со 11 бодови, а по 10 бодови имаат Слога од Злеово која е четврта и Илинден од Добрејци кој е петти на табелата.
Едноцифрен број на бодови имаат две екипи – Дрвош е шести со седум бодови, а пак Единство е претпоследен или седми со три бодови. Дури и по шест кола Напредок од Радово никако да забележи позитивен резултат – единствен тим со шест поради од толку натпревари „закован“ на дното без бодови.
Следниот викенд ќе се одиграат натпреварите од последното седмо есенско коло.
Напредок дома во Радово ќе бара први бодови против Спартмани кој е фаворит, Дрвош ќе бара бодови против Илинден, во Куклиш ќе се игра дерби меѓу Интер Кукла и Огражден а пак Слога ќе го пречека Единство од Пиперово.
