Македонскиот одбојкарски првак ОК Струмица ги заврши настапите во Лигата на шампионите, откако и во реваншот во Букурешт беше поразен од најтрофејниот романски клуб Динамо со убедливи 3:0 (25-17, 25-17, 25-13).
По поразот со идентичен резултат во првиот меч во Скопје, стана јасно дека романскиот шампион е на повисоко ниво, а тоа го потврди и на домашен терен, без да му дозволи на македонскиот првак да освои ниту еден сет. Струмичани имаа добри моменти во првите два сета, но искуството и квалитетот на домаќините пресудија.
Најрасположен во редовите на Струмица беше Кристијан Илиев со 12 поени, додека Филип Маџунков додаде 7 поени. Кај Динамо, најдобри поентери беа Петар Премовиќ со 10 и Џонатас Кардозо со 9 поени.
Иако настапот во Лигата на шампионите заврши, за Струмица европската авантура продолжува. Тимот ќе се натпреварува во ЦЕВ купот, каде што во првото коло ќе го очекува дуел со чешкиот претставник Јухострој Чешке Будејовице. Првиот натпревар ќе се одигра на 12 ноември во Македонија, а реваншот на 19 ноември во Чешка.
