Кошаркарите на ТФТ продолжуваат со одличните настапи во новата сезона од регионалната АБА 2 лига. Тимот од Тафталиџе ја забележа и втората победа по ред, совладувајќи ја новосадска Војводина со резултат 75:69, по голем пресврт во последната четвртина на мечот одигран во СРЦ „Кале“.
Мечот беше крајно изедначен во најголемиот дел од текот. Првата и третата четвртина завршија со идентичен резултат 19:19, додека Војводина во втората беше минимално подобра (20:18). На почетокот од последниот период гостите имаа свој моментум и поведоа со 65:56, највисока разлика на натпреварот.
Сепак, токму тогаш ТФТ одигра најдобро. Со серија 11-0, предводени од Ташовски, Зафиров и Гордон, скопскиот тим за само неколку минути успеа целосно да ја анулира негативата и да поведе со 67:65, на нешто повеќе од три минути до крајот.
Во завршницата ТФТ покажа карактер. На почетокот на последната минута имаше водство од 69:66, а на 20 секунди пред крајот Гордон погоди две слободни фрлања за 71:67, со што го потврди пресвртот и стигна до својот 21. поен на натпреварот. Во последните моменти, Говенс и Ташовски беа сигурни од линијата за слободни фрлања и ја запечатија победата на својот тим.
Најефикасен во редовите на ТФТ беше Гордон со 21 поен и 9 скока, а одличен настап имаше и Ташовски, кој реализираше 18 поени, 7 скока и 5 асистенции. Говенс додаде 14 поени со 4 асистенции, а Зафиров придонесе со 10 поени, 7 скока и 3 асистенции.
Со овој триумф, ТФТ ја потврди својата добра форма и најави високи амбиции во новата сезона од АБА 2 лигата. Следниот натпревар „црно-белите“ ќе го одиграат на 4 ноември, повторно во „Кале“, кога за противник ќе го имаат словенечкиот Хелиос.
