Македонскиот футсал шампион Форца го очекува нов голем европски предизвик. Тимот од Куманово од денес веќе е во словенечката престолнина Љубљана, каде ќе ги одигра натпреварите од главната рунда во рамки на УЕФА футсал Лигата на шампиони.
Форца се најде меѓу најдобрите 32 екипи во Европа, откако во претходната квалификациска фаза импресивно го освои првото место во својата група со три победи – против тимовите од Сан Марино, Ерменија и Андора. Со тоа, кумановскиот состав избори пласман во елитното друштво и го продолжи историскиот европски пат за македонскиот футсал.
Во Љубљана, Форца ќе биде дел од групата 8, во која противници ќе ѝ бидат два силни украински тима – ХУТ Киев и Аурора Тим, како и домашниот претставник Футсал Силико. Сите натпревари ќе се играат во словенечката престолнина, а пласман во следната фаза ќе избори само најдобро пласираниот тим во групата.
Во редовите на Форца владее голем оптимизам и верба дека екипата ќе го даде својот максимум за достојно претставување на македонскиот футсал. Стручниот штаб и играчите најавуваат борбени настапи против европските гиганти и веруваат дека со дисциплина, срце и енергија може да се постигне уште еден историски резултат.
Првиот меч Форца го игра веќе утре против екипата на Хут од Киев со почеток од 17 часот. Во четврток следува соочување со Силико, меч кој е закажан за во 20 часот, а пак третиот меч ќе биде против Аурора Тим за во петок од 16 часот.
Со настапот во Љубљана, Форца продолжува да го гради својот европски идентитет и да ја пишува најуспешната страница во историјата на македонскиот футсал.
