Фудбалскиот клуб Тиквеш именува нов шеф на стручниот штаб — Борче Христов. Тој доаѓа на местото на Ѓорги Мојсов, кој си поднесе оставка по поразот од Арсими во 10 коло од Првата македонска фудбалска лига.
Раководството на клубот брзо реагираше и ја донесе одлуката клупата да му ја довери на искусниот 55-годишен стратег, кој зад себе има богато тренерско искуство. Покрај азербејџанскиот клуб Зира, Христов во својата кариера беше тренер и на Шкендија, Македонија ЃП, Еуромилк ГЛ, Борец и Работнички во македонскиот шампионат, како и во азербејџанскиот Карабах.
Дополнително, тој беше и спортски директор на академијата на Вардар, како и дел од Одделот за фудбалски развој при Фудбалската федерација на Македонија.
Од Христов се очекува да внесе нова енергија, дисциплина и поголема борбеност во тимот, со цел Тиквеш да се врати на победничките патеки и да се оддалечи од долниот дел на табелата. Своето деби на клупата ќе го има во четврток на гостински терен во Битола против екипата на ФК Пелистер, со почеток од 17:00 часот под рефлектори.
