Ракометниот клуб Охрид е на чекор од засилување на позицијата среден бек, откако Ловро Јотиќ се најде надвор од терените поради повреда. Според наши информации, избраниот нов играч е добро познатото име – српскиот плејмејкер Младен Крсманчиќ.
Крсманчиќ, кој минатата сезона го носеше дресот на Вардар 1961, веќе е во Охрид и беше забележан на трибините за време на натпреварот со Радовиш. Неговото присуство низ градот ги подгрева шпекулациите дека трансферот е само прашање на време.
Ако договорот биде официјализиран, 33-годишниот ракометар ќе се приклучи на тимот на Борис Ројевиќ како клучно засилување на средниот бек, зголемувајќи ја и српската колонија во редовите на охридскиот клуб.
Крсманчиќ носи богато искуство од кариерата – настапувал за Југовиќ, Слога и Железничар во Србија, а играл и во Унгарија и Шпанија. Во дресот на Вардар настапуваше и во ЕХФ Лигата на Европа, каде беше еден од водечките играчи во бековската линија.
Овој потег на Охрид доаѓа во клучен момент, непосредно пред европскиот дуел со тимот на Баку. Според достапните информации, сите детали околу трансферот се речиси усогласени, а официјалната потврда се очекува во наредните денови.
