Ракометниот клуб Вардар остана без својот прв голман за наредниот период. Португалецот Мигуел Фереира Еспиња ќе паузира од четири до шест недели, откако беше подложен на операција на коленото.
„Црвено-црните“ ќе мора да се снаоѓаат без важниот член на својот тим, кој во текот на неделата успешно беше опериран од доктор Небојша Настов. Интервенцијата помина без компликации, а според лекарските проценки, голманот ќе започне со рехабилитација веднаш по завршувањето на почетниот период на опоравување.
Фереира Еспиња уште од стартот на сезоната чувствуваше болки во коленото, што го спречуваше да настапува со полн интензитет. По консултација со медицинскиот тим на клубот, беше одлучено проблемот да се реши хируршки, со цел целосно закрепнување и подготвена враќање меѓу стативите.
Во Вардар се надеваат дека опоравувањето ќе помине според планот и дека искусниот чувар на мрежата наскоро повторно ќе им се придружи на соиграчите.
