Ракометарите на Охрид се во завршна фаза од подготовките за двомечот со Баки во рамките на второто коло од Европскиот куп на ЕХФ. По договор меѓу клубовите, охриѓани ќе бидат домаќини на двата натпревари кои ќе се одиграат во салата „Билјанини извори“.
На официјалната прес-конференција пред дуелот, зборуваше еден од најискусните ракометари во тимот, Иван Тасески.
„Атмосферата во Охрид е одлична. Новите момци кои дојдоа се доста квалитетни, имаме одлична хемија од старт. Добро се подготвуваме за секоја средба, а така и за овој со Баки. Се надевам дека со нашата добра игра во одбрана уште на првиот меч со висока победа ќе си осигураме пласман во следната фаза на ЕХФ Купот. Ги повикувам љубителите на ракометот и навивачката група „Рибари“ да дојдат во што поголем број и да бидат наша поддршка“, изјави Тасески.
Охрид ќе го одигра првиот натпревар против Баки во сабота од 18 часот, а реваншот е закажан за недела во истиот термин и на истото место. Тимот на Борис Ројевиќ со оптимизам влегува во европската авантура, решен да ја потврди фаворитската улога и пред својата публика да обезбеди пласман во следната фаза.
