Второлигашот Осогово во пол ек ги реализира подготовките за новата сезона која ќе започне на 23 август. Клубот од Кочани предводен од искусниот стратег Крсте Крстев веќе работи според планот со двојна програма на тренинзи дневно.
Првиот пријателски меч ќе биде со екипата на Брера, а истиот ќе се одигра на градскиот стадион „Никола Мантов“ во Кочани, а раководството работи на ангажман на неколку нови засилувања.
„Подготовките веќе една недела се реализираат според планот со двојна програма на тренинзи дневно. Фудбалерите максимално професионално ги извршуваат задачи и веќе во среда ќе го имаме првиот тест натпревар со Брера во Кочани, од кој очекуваме подигнување на формата од секој аспект на повисоко ниво. Паралелно, управата работи на пополнување на ростерот за следната сезона со уште најмалку двајца фудбалери, со цел да влеземе во рамноправна конкуренција и со сите клубови од Втора лига“, вели Крстев.
Осогово досега ги промовираше искусниот дефанзивец Христијан Митревски од новиот прволигаш Башкими, голманот Филип Лазаревски кој дојде од Вардарски и младиот Христијан Поп Антоски кој доаѓа од Детонит Плачковица.
