Македонскиот суперлигаш МРК Куманово покрај засилувањата на играчки план, активно работи и на комплетирање на тренерскиот и стручниот кадар за новата сезона.
Од клубот официјално потврдија дека кумановската ракометна легенда Миодраг Јовановски – Црни ќе биде дел од стручниот штаб на новиот тренер Аце Станковски.
Јовановски, со своето големо искуство и авторитет, ќе има важна улога во тренинзите на првиот тим, а соработката со клубот е логичен чекор по неговиот континуиран ангажман и придонес во развојот на кумановскиот ракомет.
Дополнително, Давид Стојковски и Христијан Димковски, двајцата млади, надежни и амбициозни тренери, ги продолжуваат договорите со клубот и ќе продолжат да работат во младинските категории. Тие се веќе препознатливи по одличната работа со најмладите ракометари, а резултатите кои ги постигнуваат во сите возрасни категории се доказ за нивниот квалитет и посветеност.
Со ваквата организациска поставеност, МРК Куманово потврдува дека е клуб кој се гради на здрави основи, не само со квалитетен прв тим, туку и со силна тренерска структура и континуитет во развојот на млади ракометни таленти.
