Фудбалскиот клуб Вардар, актуелен победник на Купот на Македонија, ги постави мотивите високо за претстојната сезона 2025/26. На денешниот состанок во тренинг базата во Раденци, управата на клубот, претставена преку извршниот директор Миленко Неделковски, заедно со шефот на стручниот штаб Гоце Седлоски и капитените на тимот Горан Закариќ и Азер Омерагиќ, договори значителни премии за играчите и стручниот штаб.
Доколку Вардар успее да ја освои шампионската титула во Првата македонска фудбалска лига, премијата ќе изнесува 250.000 евра. Но, ако тимот стигне чекор понатаму и освои двојна круна – шампионат и Куп на Македонија, вкупната премија ќе се зголеми на импресивни 350.000 евра.
Покрај тоа, за првиот натпревар од квалификациите за Конференциската лига против Сан Марино, клубот обезбеди и дополнителна премија од 50.000 евра доколку вардарци успеат да го елиминираат противникот.
Овие високи премии ја покажуваат сериозноста на раководството и амбициите на Вардар да продолжи да доминира на домашната сцена и да оствари добри резултати на европската сцена.
