Ракометниот клуб Младост 1977 од Богданци продолжува амбициозно да се подготвува за новата сезона, а во тој процес го потврди и ангажманот на млад и перспективен ракометар – Гоце Аргиров, кој ќе го засили тимот на левата крилна позиција.
Аргиров има само 19 години, но веќе стекна завидно ракометно искуство. Со своите 185 сантиметри висина, ќе биде вистинско освежување во редовите на тимот од Богданци. Доаѓа од прволигашот РК Астраион од Струмица, каде што настапуваше во изминатите четири сезони.
Интересно е што Гоце токму во академијата на Младост од Богданци ги направи првите чекори во ракометот, пред да замине во Струмица. Сега, практично, се враќа „дома“ и ќе потпише договор со Младост 1977 најмалку на една година.
Тој потекнува од селото Николич кај Дојран, и важи за играч со голем потенцијал, брзина и интуиција, а во клубот очекуваат брзо вклопување, како и значителен придонес во борбата за повисок пласман и влез во ракометната Суперлига.
Со ангажманот на Аргиров, Младост 1977 покажува дека има јасна визија за иднината – градење на млад, домашен, но квалитетен тим кој ќе биде конкурентен во секој натпревар.
Тимот од Богданци има амбиции за влез во Суперлигата односно враќање во елитата, а за таа цел го ангажираше и искусниот стратег Горан Андоновски од Охрид да го води тимот, а во следниот период се очекува промоција на повеќе ракометари.
