Ракометниот клуб Бутел Скопје го доби силното засилување на голманската позиција со потпишувањето договор до 2027 година со Благојче Трајкоски.
Триесет и осум годишниот Трајкоски има богато искуство во македонскиот ракомет, настапувајќи за повеќе клубови и со значајни настапи на меѓународната сцена, вклучувајќи го Светското првенство во Франција 2017 година како дел од македонската репрезентација. Потекнува од Прилеп, а бранеше во Куманово, Радовиш, МАКС Струмица, Охрид, како и во Еурофарм Пелистер каде беше стандарден голман четири сезони. Во последните сезони настапуваше за Автокоманда, а сега е ново име на голманската позиција во Рк Бутел Скопје.
Покрај ангажманот на Трајкоски, клубот ја продолжи соработката со тренерот Горан Кузманоски и средниот бек Димитар Ѓеоргиевски, додека се раздели со играчите Бојан Блажески, Антонио Николоски, Драган Шољиќ, Христијан Милошески и Кристијан Давитковски.
Со ова засилување и задржувањето на клучни играчи и тренер, РК Бутел Скопје ја зацврстува својата одбрана и се подготвува за новите предизвици во ракометната сезона.
