Женската сениорска репрезентација на Македонија загуби со 0:3 (7:25, 16:25, 6:25) од фаворитот Швајцарија во вториот натпревар од годинешното издание во ЦЕВ Европската Сребрена лига.
По победничкиот старт во петокот против Луксембург се надеваа девојките на селекторот Стефан Пауновиќ дека ќе можат да најдат начин да го изненадат противникот, но уште од самиот старт го загубија ритамот.
Комплетно ја смени Пауновиќ поставата на Македонија за вториот дуел, но ништо не ни одеше од рака ниту во полето, ниту на мрежата и едноставно не можевме да најдеме решение за како поквалитетно да му се спротивставиме на ривалот.
Швајцарија го презентираше својот квалитет и сила и заслужено дојде до убедлив триумф.
Ива Стојкоска со седум поени беше најефикасна во нашите редови, додека кај Швајцарија Ајшлер постигна 14, а Матер 11 поени.
Нова шанса за радост во ЦЕВ Европската Сребрена лига Македонија ќе бара следниот викенд кога на Фарски Острови го игра вториот турнир, каде покрај домаќинот за противник ја имаат и Австрија.
