Во недела на програмата се натпреварите од 5. коло на Првата женска фудбалска лига. Екипата на Скопје на домашен терен ќе се соочи со Тиверија Брера која на стартот од новата сезона е максимална и во Пржино ќе ја бара петтата победа во низа.
Скопје во новата сезона има скор од три победи и еден пораз, наспротив струмичанки кои ќе бидат фаворити на мечот во Пржино. Натпреварот ќе започне во 16 часот, а главен судија на истиот ќе биде Вјолца Изеири.
Дербито на 5. коло се игра во Македонска Каменица каде ќе се соочат екипите на Каменица Саса и Ај Јунајтед. Дуел на две екипи кои сакаат три бодови како единствена опција. Саса го загуби големото дерби со актуелниот шампион Љуботен во Тетово, а пак Ас Јунајтед не тргна според планот забележа една победа и два порази во трите меча што ги одигра досега.
Тоа го прави овој меч да биде неизвесен и полн со мотив за борба на теренот за освојување на целиот „плен“. Главен судија на мечот ќе биде Виктор Јанчевски од Скопје, а стартот е во 15 часот.
Во кумановска Речица со почеток од 16:30 часот ќе се сретнат екипите на Речица и шампионот Љуботен во меч каде гостинот од Тетово е апсолутен фаворит за трите бодови. Квалитетот прави огромна разлика меѓу овие две екипи. Задолжен за правдата на овој меч ќе биде Спире Арсов.
Во Битола силите ќе ги одмерат екипите на Топ Гол и Истатов во меч каде домашниот тим кој минатата сезона преку бараж го избори опстанокот ќе атакува на прва победа во новата сезона, а ќе го бара и првиот погодок во новата сезона против Истатов, кој пак во новата сезона од три меча има една победа и два порази.
Мечот ќе започне во 16:30 часот, а правдата ќе ја дели Драган Стевановски.
Во рамки на петтата рунда екипата на Атлетико од Битола ќе биде слободна, бидејќи требаше да игра со откажаната Шкендија, а тоа прави во секое коло да има по една слободна екипа.
- ДЕЛЕГИРАНИ СУДИИ 5. КОЛО ПРВА ЖЕНСКА ФУДБАЛСКА ЛИГА:
Скопје – Тиверија Брера, Вјолца Изеири (Гостивар)
Каменица Саса – Ас Унитед, Виктор Јанчевски (Скопје)
Речица – Љуботен, Спире Арсов (Кочани)
Топ Гол – Истатов, Драган Стевановски (Велес)
