Одбојкарите на Штип УГД ја вратија неизвесноста во финалната серија од Првата машка лига, откако вечерва на домашен терен славеа со убедливи 3:0 (25:21, 25:23, 25:15) против актуелниот шампион Струмица. Со овој триумф, штипјани го намалија водството на струмичани на 2:1 во победи и го продолжија својот сон за шампионската титула.
Избраниците на Кристијан Ристески одиграа максимално мотивирано и фокусирано, покажувајќи зрелост и тимска игра кога беше најпотребно. Клучна улога одиграа со моќен сервис – само во третиот сет имаа дури осум ас-сервиси – што го наруши ритамот на гостите. Најефикасен беше Задмард со 18 поени, а веднаш зад него беа Арсов (12) и Багаев (10), додека Стојанов одлично го водеше тимот со седум свои поени и сигурна игра на распределба.
На спротивната страна, шампионот беше далеку од своето најдобро издание. Владо Милев се обиде да ја одржи екипата во игра со девет поени, но без поголема поддршка од соиграчите. Илиев додаде седум поени, но тоа не беше доволно за да се избегне убедливиот пораз.
Четвртиот меч, кој може да ја одлучи судбината на титулата, се игра в понеделник од 19 часот во салата „Парк“ во Струмица.
