Одбојкарките на Струмица жени продолжуваат да се натпреваруваат во Првата женска лига и следната сезона. Струмичанки го одбранија својот прволигашки статус со две убедливи победи против Вардар жени во баражот за опстанок.
Во првиот меч, одигран на гостински терен, Струмица жени славеа со максимални 3:0, што беше првиот важен чекор кон обезбедување на место во најсилното друштво. Денеска, на домашен терен, струмичанките повторно беа убедливи и со нова победа го потврдија својот статус во Првата лига.
Вардар жени, кои имаа одлична сезона во Втората лига, завршија во топ-4 и си создадоа шанси за промоција во најсилната лига, но немаа сили да ја преминат последната пречка и да обезбедат пласман во Првата лига.
Последниот учесник во Првата женска лига ќе биде познат по вториот бараж, во кој ќе се сретнат Ускана и Бами Кор. Кичевскиот тим има предност од 1:0 во победи.
